ජීවිත රක්ෂණ ක්ෂේත්‍රයේ දැවැන්තම සහ ශක්තිමත්ම රක්ෂකයා වන ශ්‍රී ලංකා ඉන්ෂුවරන්ස් ලයිෆ් (SLIC Life) හි වසරේ දැවැන්තම උත්සවය වන Star Awards 2024 උළෙල පසුගියදා කොළඹ Shangri-La හිදී පැවැත්විණි. ‛විශිෂ්ඨත්වයේ වීරයන්’ (Heroes of Excellence) මෙම වසරේ තේමාව විය. රක්ෂණ උපදේශක, කණ්ඩායම් නායක, සමූහ නායක, ශාඛා කළමනාකරු, ප්‍රාදේශීය කළමනාකරු, බැංකු රක්ෂණ විකුණුම් නිලධාරී (Bancassurance Sales Officer) සහ බැංකු රක්ෂණ ජ්‍යෙෂ්ඨ ප්‍රාදේශීය විධායක නිලධාරී (Bancassurance Senior Area Executive) ඇතුළු කාණ්ඩ කිහිපයක් හරහා විශිෂ්ඨ දස්කම් දැක්වූ ජයග්‍රාහකයින් 300කට අධික සංඛ්‍යාවක් මෙහිදී ඇගයීමට ලක් විය. ඉහත සෑම කාණ්ඩයක් යටතේම ජයග්‍රාහකයින් සඳහා විශේෂ ඇගයීම් සම්මාන පිරිනැමිණි. දිවයිනේ විශිෂ්ටතම ප්‍රාදේශීය කළමනාකරු පී. සාතියන් මහතා (උතුරු කලාපය), දිවයිනේ විශිෂ්ටතම ශාඛා කළමනාකරු ඒ. සුපේසන් මහතා (යාපනය ශාඛාව), දිවයිනේ විශිෂ්ටතම සමූහ කණ්ඩායම් නායක එන්. නර්තනන් මහතා (චාවකච්චේරි), දිවයිනේ විශිෂ්ටතම කණ්ඩායම් නායක අමිල ප්‍රසාද් මහතා (කිරිබත්ගොඩ), දිවයිනේ විශිෂ්ටතම නව ව්‍යාපාර හඳුන්වාදීම් (උපදේශක කාණ්ඩය) එන්. නාගරාජා මහතා (යාපනය), දිවයිනේ විශිෂ්ටතම ජීවිත රක්ෂණ උපදේශක එස්. එම්. එම්. ජී. සුබසිංහබණ්ඩා මහතා (නුගේගොඩ) සහ දිවයිනේ විශිෂ්ටතම බැංකු රක්ෂණ අලෙවි නිලධාරී ඒ. එල්. ටී. එම්. ලියනගේ මහත්මිය, 2023 වසර පුරා ඔවුන්ගේ විශිෂ්ට ජයග්‍රාහණ සහ කැපවීම වෙනුවෙන් මෙම උළෙලේ දී ඇගයීමට පාත්‍ර වන ලදී . ශ්‍රී ලංකා ඉන්ෂුවරන්ස් ලයිෆ් හි සභාපති නුසිත් කුමාරතුංග මහතා, සමූහ ප්‍රධාන විධායක නිලධාරී චන්දන එල්. අලුත්ගම මහතා සහ ආයතනික කළමනාකාරීත්වය ඇතුළු 350 කට අධික පිරිසක් මෙම අවස්ථාවට සහභාගී වූහ. මෙම උත්සවයේදී ආයතනයේ විශිෂ්ඨත්වය සහ කැපවීම තවදුරටත් තහවුරු කරමින් Platinum Star Club සහ Platinum Club හි සාමාජිකයින්ට විශේෂ උපහාරයක්ද පිරිනැමිණි. Star Awards 2024 සම්මාන උළෙල ආශ්වාදයේ සහ අභිප්‍රේරණයේ නොමැකෙන සලකුණක් තබමින් අති උත්කර්ෂවත් අන්දමින් අවසන් විය. සම්මාන උළෙල විවිධ නර්තන සහ ගායන අංග වලින් විචිත්‍රවත් විය. එසේම ශ්‍රී ලංකා ඉන්ෂුවරන්ස් හි විකුණුම් බලකාය තම ජයග්‍රහණයන් සමරමින් ඉදිරි වසර තුළ එම ජයග්‍රහණ අභිබවා යාමට අදිටන් කරගැනීමක් ද මෙම සම්මාන උළලේදී පිළිඹිබු විය. නොසැලෙන කැපවීමකින් යුතුව, ශ්‍රී ලංකා ඉන්ෂුවරන්ස් ලයිෆ් අඛණ්ඩව තම ව්‍යාපාරික අරමුණු කරා යමින් විශිෂ්ඨ පාරිභෝගික සේවාවක් ලබාදීම සහතික කරමින් කටයුතු කිරීමට බැඳී සිටී.